पोखराको मुस्ताङचोकमा रोटरी ‘किड्नी केयर सेन्टर’ शिलान्यास

पोखरा । रोटरी क्लब अफ पोखरा लेकसाइडले पोखरा–७, मुस्ताङचोकमा रोटरी किड्नी केयर सेन्टर निर्माण गर्ने भएको छ ।

सुरुवातमा १० मेसिन राखेर निर्माण हुने सो सेन्टरको लागत प्रारम्भमा २ करोड ७८ लाख रुपैयाँ लाग्नेछ ।

पछि तीनतले आरसिसि बिल्डिङमा थप २० मेसिन संचालन गर्दा ६ करोड ८७ लाख सहित कुल ९ करोड ६५ लाख रुपैयाँ खर्च हुने निर्माण समिति संयोजक राजेन्द्र लिगलले जानकारी दिए ।

डायलायसिस मेसिन रोटरी इन्टरनेशनल डिष्ट्रिक्ट ३२९२ नेपाल–भुटानले सहयोग गर्ने छ । सेन्टरको प्रारम्भिक संरचना चालु आर्थिक वर्षभित्र सक्ने योजना छ ।

सेन्टर भवनको शिलान्यास आइतबार गण्डकी प्रदेशका आर्थिक ममिला तथा योजना मन्त्री किरण गुरुङले गरे । उनले सेन्टर स्थापनामा प्रदेश सरकारले सहयोग गर्ने प्रतिबद्धता जनाए ।

रोटरी इन्टरनेशनल डिष्ट्रिक्ट ३२९२ का डिष्ट्रिक्ट गभर्नर किरणलाल श्रेष्ठले हालसम्म ६५ वटा मेसिन वितरण गरिसकिएको र आफ्नो कार्यकालमा १ सय ५० वटा पु¥याउने प्रतिबद्धता व्यक्त गरे ।

रोटरी इन्टरेशनल प्रेसिडेन्ट रिप्रिजेन्टेटिभ आन ब्रिट अस्वेलले पोखरा सुन्दर सहरको उल्लेख गर्दै यहाँ बन्ने सेन्टरको सफलताको शुभकामना दिइन् ।

कार्यक्रममा प्रदेश सांसद राजीव पहारी, पत्रकार महासंघ कास्की अध्यक्ष दीपेन्द्र श्रेष्ठ, वडा ७ अध्यक्ष रामचन्द्र बराल लगायत बोलेका थिए ।

रोटरी क्लब अफ पोखरा लेकसाइड अध्यक्ष घराना थकालीको अध्यक्षतामा भएको कार्यक्रमको संचालन क्लबका प्रेसिडेन्ट इलेक्ट अर्जुन खनालले गरेका थिए । समारोहमा रोटरीका पास्ट गभर्नर चिन्तामणि भट्टराई, योगेन्द्र प्रधान, तीर्थमान शाक्य लगायत थाइल्याण्ड र जापानका रोटरियनको पनि उपस्थिति थियो ।

पोखरा उपत्यका नगर विकास समितिले दिएको ३ रोपनी ४ आना जग्गामा निर्माण हुने सेन्टरले वार्षिक ३ लाख ९० हजार भाडा बुझाउपर्ने सम्झौता रहेको निर्माण समिति संयोजक लिगलले जानकारी दिए।

नियमित डायलाइसिस गर्दा बिरामीले सरकारी अस्पतालमा पालो कुनुपर्ने बाध्यता विद्यामान छ। तीन वर्षअघि स्थापित रोटरी क्लब अफ पोखरा लेकसाइडले यसअघि रेडक्रस कास्कीलाई एम्बुलेन्स सहयोग गरेको थियो।

फेसबुकबाट तपाइको प्रतिक्रिया