राष्ट्रपतिद्वारा फागुन २३ गतेका लागि संसद् अधिवेशन आह्‍वान

काठमाडौं । राष्ट्रपति विद्यादेवी भण्डारीले फागुन २३ गते अपरान्ह ४ बजे बस्ने गरी प्रतिनिधिसभाको अधिवेशन आह्वान गरेकी छन् । सरकारले प्रतिनिधिसभा बैठक बोलाउन राष्ट्रपति समक्ष सिफारिस गरेको थियो । सरकारको सिफारिस बमोजिम राष्ट्रपति भण्डारीले फागुन २३ गते अपरान्ह चार बजेका लागि बैठक आह्वान गरेकी हुन् ।

प्रधानमन्त्री केपी शर्मा ओलीको सिफारिसमा पुस ५ गते राष्ट्रपति विद्यादेवी भण्डारीले प्रतिनिधिसभा विघटन गरेकी थिइन् । विघटनविरुद्ध सर्वोच्च अदालतमा १३ वटा रिट निवेदन परेका थिए । सर्वोच्चले ती निवेदनमाथि सुनुवाइ गर्दै फागुन ११ गते प्रधानमन्त्रीको सिफारिस र राष्ट्रपतिको विघटन घोषणा असंवैधानिक ठहर गर्दै प्रतिनिधिसभा पुनःस्थापना गरेको थियो ।

सर्वोच्चले १३ दिनभित्र बैठक बस्ने गरी व्यवस्था गर्न राष्ट्रपति, प्रधानमन्त्री र सभामुखका नाममा परमादेश जारी गरेको थियो । सोहीबमोजिम मन्त्रिपरिषद्ले संघीय संसद् अधिवेशन आह्वानका लागि राष्ट्रपतिसमक्ष सिफारिस गरेको हो ।

 

फेसबुकबाट तपाइको प्रतिक्रिया