स्थानीय तह निर्वाचनमा पार्टीले एक्लै प्रतिस्पर्धा गर्ने : डा. शशांक कोइराला

काठमाडौं । नेपाली कांग्रेसका नेता डा. शशांक कोइरालाले वैशाख ३० गते हुने स्थानीय तह निर्वाचनमा पार्टीले एक्लै प्रतिस्पर्धा गर्नुपर्ने बताएका छन् । बिहीबार बसेको पार्टीको केन्द्रीय कार्यसम्पादन समिति बैठकमा उनले स्थानीय तहको निर्वाचनमा गठबन्धन गर्न नहुने बताएका हुन् ।

बैठकपछि पत्रकारहरुसँग कुरा गर्दै पूर्वमहामन्त्री कोइरालाले पार्टीले आफ्नो अस्तित्वका लागि पनि गठबन्धन गर्न नहुने धारणा राखेका हुन् । ‘अब हामीले आफ्नो अस्तित्व जोगाउनुपर्छ, कोही अर्को पार्टीसँग नमिली (निर्वाचनमा) जानुपर्छ’ कोइरालाले आफूले बैठकमा राखेको धारणाबारे भने ।

स्थानीय तह निर्वाचनलगायतका विषयमा छलफल गर्न बिहीबार पार्टी कार्यालय सानेपामा कांग्रेसको केन्द्रीय कार्यसम्पादन समितिको बैठक बसेको थियो ।