शेर्पा संघ जापानले मार्च २ तारिख टोकियोमा ग्याल्पो ल्होसार मनाउने

टोकियो । शेर्पा संघ जापानले आगामी मार्च २ तारिख आइतबार टोकियोमा हिमाली बौद्ध धर्मावलम्बीहरुको महान चाड ग्याल्पो ल्होसार २०२५ मनाउने भएको छ । आगामी २०२५ मार्च २ तारिख आइतबारका दिन राजधानी टोकियोमा हिमाली बौद्ध धर्मावलम्बीहरुको पर्व ग्याल्पो ल्होसार मनाउने भएको हो ।

यो वर्षको ल्होसारमा नेपालबाट चर्चित कलाकार लहमु शेर्पा, अतिथि लामा धर्म गुरु खेन्पो ङावाङ छेपाल शेर्पा लगायत स्थानीय कलाकार सोनाम कहानि, दावा के शेर्पा र डीजे नबिनको प्रस्तुति रहने आयोजक शेर्पा संघ जापानका अध्यक्ष सोनाम शेर्पाले जानकारी दिनुभयो । शेर्पा संघ जापानले हरेक वर्षझैं यस वर्ष पनि प्रवासमा रहेर पनि आफ्नो भाषा, धर्म, कला र संस्कृतिको संरक्षण गर्ने उद्देश्यले यो कार्यक्रम आयोजना गरेको हो । कार्यक्रममा ग्याल्पो ल्होसारको शुभकामना आदानप्रदान तथा सांस्कृतिक कार्यक्रमहरु हुनेछन् ।

शेर्पा संघ जापानले सम्पूर्ण जापानबासी शेर्पा समुदाय लगायत गैर शेर्पा दाजुभाइ तथा दिदीबहिनीहरुलाई यस कार्यक्रममा उपस्थित हुन हार्दिक निमन्त्रणा गरेको छ ।