कोरोना संक्रमणबाट मृत्यु हुनेको संख्या १५ लाख नजिक,एकैदिन १२ हजार बढीको मृत्यु

गत वर्षको डिसेम्बरमा शुरु भएको कोरोना भाइरस संक्रमणका कारण हालसम्म १४ लाख ९९ हजार २१८ जनाको मृत्यु भएको छ ।

चीनको हुृबे प्रान्तको वुहान शहरबाट गत वर्षको डिसेम्बरमा शुरु भएको कोरोना संक्रमण पछिल्लो समय विश्वमा महामारीको रुपमा फैलिदैं गएको छ । युरोपियन मुलुकहरुमा दोस्रो लहरको संक्रमण तीब्र हुँदा मृतक संख्यामा फेरि नयाँ रेकर्ड कायम भएको छ । पछिल्लो २४ घण्टामा १२ हजार ३०९ संक्रमितको मृत्यु भएको छ । एकै दिन मृत्यु भएका संक्रमितको यो संख्या अहिलेसम्मकै उच्च हो । युरोपमा मात्रै पछिल्लो २४ घण्टामा ५ हजार ३२८ जनाको मृत्यु भएको छ ।

पछिल्लो २४ घण्टामा ६ लाख २७ हजार ९ सय भन्दाबढी संक्रमण भएको छ । योसँगै विश्वभर सक्रिय संक्रमितको संख्या १ करोड ८४ लाख २ हजार ७७३ पुगेको छ । जसमध्ये १ लाख ६ हजार ६९७ जनाको अवस्था गम्भीर रहेको वर्ल्डोमिटर्सले जनाएको छ ।

हालसम्म कुल संक्रमितको संख्या ६ करोड ४८ लाख ३८ हजार ८९६ पुगेको छ । संक्रमितमध्ये ४ करोड ४९ लाख ३६ हजारभन्दा बढी संक्रमणमुक्त भएका छन् ।

संक्रमणका कारण उत्तर अमेरिकी मुलुकहरूमा ४ लाख १५ हजार ९०४ जनाको मृत्यु भएको छ । उत्तर अमेरिकी मुलुकहरूमा सबैभन्दा धेरै संयुक्त राज्य अमेरिकामा २ लाख ७९ हजार ८६५ जनाको मृत्यु भएको छ । मृत्यु हुनेको यो संख्या विश्वमै पनि सबैभन्दा धेरै हो ।

यस्तै एसियाली मुलुकमा २ लाख ९५ हजार १५० जनाको मृत्यु भएको छ । एसियामा सबैभन्दा धेरै भारतमा १ लाख ३८ हजार ६५७ जनाको मृत्यु भएको छ । हालसम्म ९५ लाख ३३ हजारभन्दा बढी मानिस संक्रमित भएका छन् । संक्रमितमध्ये ८९ लाख ७० हजारभन्दा बढी निको भएका छन् ।

ब्राजिलमा कोरोना भाइरसबाट सङ्क्रमित हुनेको संख्या ६४ लाख ३६ हजार ६५० पुगेको छ भने १ लाख ७४ हजार ५३१ जनाको मृत्यु भएको छ । संक्रमितमध्ये ५६ लाख ९८ हजार भन्दा बढी निको भएका छन् ।